Qubada 6 kəndi birləşdirən Talabıqışlaq-Talabı-Toxmar avtomobil yolu istifadəyə yararsızdır. Bu barədə ShimalNews 23 noyabr tarixində “ATV”yə istinadən məlumat verir.
Sakinlər deyirlər ki, bura sonuncu dəfə sovet dönəmində asfalt çəkilib. İndi isə nəqliyyatın hərəkəti son dərəcə çətinləşib. Yayda toz-duman, qışda palçıqlı gölməçələr 5000 nəfər əhalinin gediş-gəlişinə mane olur, avtomobillər tez-tez sıradan çıxır.
Məsələ ilə bağlı Azərbaycan Avtomobil Yolları Agentliyinin sözçüsü Anar Nəcəfli açıqlama verib. O bildirib ki, Talabıqışlaq-Talabı-Toxmar avtomobil yolunun inşası dövlət proqramına salınıb. Hazırda maliyyə vəsaitinin ayrılması gözlənilir ki, yenidən qurulması icra olunsun.
