Quba avtovağzalının qarşısındakı kanalizasiya lükü illərdir sürücülər və piyadalar üçün təhlükə mənbəyinə çevrilib. Maraqlısı odur ki, bu dəmir parçası nə itib, nə də unudulub – sadəcə yerində deyil.
Shimal.News bu məsələni dəfələrlə gündəmə gətirib. O dövrdə quyunun qapağının ümumiyyətlə harada olduğu bilinmirdi. Nəhayət, 4 il "axtarışda olan" lük qapağı tapılıb.
Amma sevinc hissi uzun çəkməyib. Çünki bu gün qapaq quyunun üzərinə yox, yanına qoyulub. Görünür, məsələ "tapmaq" mərhələsindən keçib. Artıq gələcəyin planı onu "yerinə qoymaqdır".
Daha əvvəl, təxminən 4 il öncə də bu problem gündəmdə idi. O zaman açıq qalan quyunun doğuracağı təhlükə ilə bağlı xəbərdarlıq edilmişdi. İndi isə quyu bağlanıb, amma hündür dəmir konstruksiya ilə. Nəticədə problem aradan qalxmaq əvəzinə forma dəyişib.
Hazırda avtovağzalın qarşısından keçən avtomobillər üçün bu "yenilənmiş həll" ciddi risk yaradır.
Beləliklə, Qubada lükun "həyat yoluna" baxdıqda problem mərhələ-mərhələ həll olunur:
– əvvəl açıq idi,
– sonra qapağı tapıldı,
–indi isə hər kəs qapağın yerinə düzgün qoyulmasını gözləyir.
Ümid edirik ki, növbəti xəbərimiz "lük tapıldı" yox, "lük yerinə quraşdırıldı" başlığı ilə olacaq. Shimal.News mövzunu diqqətdə saxlayır.
