Qubada 2 ay öncə Cağacuqçaya gələn selin fəsadları hələ də aradan qaldırılmayıb.
Xezerxeber.az-ın məlumatına görə, Bad və Məccə Xacə kəndlərini birləşdirən piyada körpüsü yararsız vəziyyətdədir. Bad kəndində 80 yaşayış evi var. Buradan qonşu kəndə 200-ə yaxın şagird təhsil almağa gedir. İllərlə bu körpüdən istifadə edən badlılar bu il çətinliklərlə üzləşiblər.
Sakinlər bildirirlər ki, sel aparan körpüyə görə dəfələrlə müraciət ediblər, lakin hələ də tədbir görülməyib.
Məsələ ilə bağlı Bad bələdiyyəsinin sədri Aydın Kazımov bildirdi ki, vergilərin tam yığımı başa çatdıqdan sonra körpünün təmirinə başlanılacaq. Uşaqların məktəbə getməsi üçün isə alternativ yollar mövcuddur.
