Quba rayonu Vəlvələ kəndində elektrik təsərrüfatının vəziyyəti sakinlərin narazılığına səbəb olub.
Məsələ ilə bağlı Shimal.News-a danışan kənd sakinlərinin sözlərinə görə, yaşayış məntəqəsində elektrik enerjisinin keyfiyyəti illərdir normativ tələblərə cavab vermir.
Xüsusilə aşağı məhəllələrdə gərginlik normadan xeyli aşağı düşür; bəzi hallarda 125-130 volta qədər olur. Bu isə məişət avadanlıqlarının işləməməsinə, hətta sıradan çıxmasına səbəb olur. Sakinlər bildirirlər ki, qış aylarında vəziyyət daha da ağırlaşır: kombi sistemləri işə düşmür və evləri isitmək mümkün olmur.
"Axşam saatlarında vəziyyət daha da pisləşir, gündüz maksimum 160-170 volt olan elektrik axşamlar 110 volta qədər düşür", - deyə sakinlər bildiriblər.
Şikayətçilər iddia edirlər ki, problemin əsas səbəbi kənd ərazisində fəaliyyət göstərən daş karxanalarına çəkilən elektrik xətləridir. Onların fikrincə, kəndə verilən elektrik enerjisinin böyük hissəsi həmin obyektlərə yönləndirilir və bu da yaşayış evlərində gərginliyin aşağı düşməsinə gətirib çıxarır.
Məsələ ilə bağlı vətəndaşlar müxtəlif qurumlara dəfələrlə müraciət etdiklərini bildirirlər. Onların sözlərinə görə, ötən il Energetika Nazirliyinin nümayəndələri əraziyə gələrək vəziyyətlə tanış olub və akt tərtib ediblər. Həmin sənəddə də elektrik enerjisinin keyfiyyət göstəricilərinin standartlara uyğun olmadığı təsdiqlənib.
Sakinə ünvanlanan rəsmi cavab məktubunda isə qeyd olunur ki, kəndin elektrik təchizatında yaranmış problemlər 10 kV-luq hava xətlərində aparılan işlər, o cümlədən daş karxanalarına çəkilmiş xətlər üzrə ağacların budanması və texniki dəyişikliklərlə bağlı olub. Bildirilir ki, bu səbəbdən müəyyən fasilələr və gərginlik dalğalanmaları yaranıb. Eyni zamanda, elektrik enerjisinin keyfiyyət göstəricilərinin yaxşılaşdırılması üçün əlavə texniki tədbirlərin planlaşdırıldığı vurğulanır.
Buna baxmayaraq, 2025-ci ildən bu yana vəziyyətdə ciddi dəyişiklik baş verməyib. Onların sözlərinə görə, problem hələ də davam edir və xüsusilə axşam saatlarında elektrik gərginliyi kritik səviyyədə qalır.
Məsələ ilə bağlı aidiyyəti qurumdan sorğumuza cavab olaraq bildirilib ki, qeyri-iş günü olduğu üçün sualı cavablandırmaq imkanları yoxdur, rəsmi iş günlərində problem tərəflərindən aydınlaşdırılacaq.
