Quba şəhərinin Heydər Əliyev prospektində su borusunun partlaması səbəbindən qazılmış yol sahəsi ilə bağlı problem hələ də tam həllini tapmayıb.
Shimal.News xəbər verir ki, bir müddət əvvəl saytda dərc olunan xəbərdə qazıntı işləri başa çatdıqdan sonra asfalt örtüyünün bərpa edilmədiyi, ərazidə sürücü və piyadaları xəbərdar edən nişanların quraşdırılmadığı diqqətə çatdırılmışdı.
Məsələ işıqlandırıldıqdan sonra ərazidə mühafizə tədbirləri görülərək xəbərdaredici nişanlar yerləşdirilib. Lakin artıq bir aydan çox vaxt keçməsinə baxmayaraq, qazılmış hissəyə yeni asfalt örtüyü vurulmayıb.
Üstəlik, müvəqqəti quraşdırılan təhlükəsizlik nişanları da zamanla sıradan çıxmağa başlayıb. Xüsusilə gecə saatlarında bu vəziyyət hərəkət iştirakçıları üçün ciddi risk yaradır və yol-nəqliyyat hadisəsi baş verməsi ehtimalını artırır.
Sakinlər aidiyyəti qurumlardan yolun tam bərpası işlərinin qısa zamanda yekunlaşdırılmasını və ərazidə təhlükəsiz hərəkətin təmin edilməsini xahiş edirlər.
