Quba şəhərinin yolları son iki aydır ki, "cərrah bıçağı" altındadır.
Shimal.News xəbər verir ki, bu bıçaq elə bil səliqəli cərrahın deyil, təcrübəsiz bir şagirdin əlindədir. Əslində, şəhərin yollarının yenilənməsi gözəl təşəbbüsdür. Amma problem ondadır ki, əməliyyat başlanıb, amma tikinti “həkimləri” xəstəni yarımçıq qoyub getməkdədir.
Qələbə, Fətəli Xan, Hacı Tağı Rüstəmov və daha bir neçə küçə aylar əvvəl qazılıb, sanki arxeoloji qazıntı aparılır. Amma burada nə qədim şəhər qalıqları tapılıb, nə də yerin altından tarixi xəzinə çıxıb. Əksinə, sürücülər üçün "off-road" parkuru, piyadalar üçün isə "sınaq zolağı" yaranıb. İnsanlar hər gün bu "müasir dövrün qədim dövr yolları" ilə addımlayır, maşın sahibləri isə avtomobillərinin hərəkətini yavaşladaraq, sanki mina sahəsindən keçirmiş kimi diqqətlə yol tapmağa çalışırlar.
Ən maraqlısı isə budur: yolların təmiri üçün dövlət büdcəsindən iki milyon manat ayrılıb. Bəs bu pullar hara gedib? Asfalt yox, rahatlıq yox, amma qazılmış, dağıdılmış küçələr var. Əgər yolların təmiri bu cür olacaqdırsa, heç qazmasaydılar daha yaxşı olmazdımı? Axı, bir şeyi düzəltmək istəyərkən onu daha da pisləşdirmək hansı məntiqə sığır?
Bu vəziyyət məşhur bir atalar sözünü xatırladır: "Gözə qaş düzəldən yerdə vurub gözü də çıxartdılar." Quba rayon icra hakimiyyəti yolları abadlaşdırmaq adı ilə onları elə hala salıb ki, indi insanlar əvvəlkindən daha çox əziyyət çəkirlər. İndi Qubanın küçələri təmir gözləyən deyil, sanki savaşdan çıxmış əraziləri xatırladır.
Yolların nə zaman təmir olunmasına gəlincə, Quba Rayon İcra Hakimiyyəti başçısının birinci müavini Tariyel İbrahimov bildirib ki, hava şəraiti normallaşan kimi küçələr asfaltlanacaq. Lakin bu açıqlama Quba sakinləri üçün "səbr kasasını" dolduran növbəti damladır. Çünki artıq iki aydır ki, bu küçələr bataqlıqdan, palçıqdan və daşlı yollardan ibarət bir səhnəyə çevrilib.
Əgər yolların taleyi havaya bağlıdırsa, bəs niyə təmir işləri başlananda bu hava şəraiti nəzərə alınmadı? Yoxsa, asfaltı da bahar çiçəkləri kimi günəşli havanı gözləyərək açacaqlar? Hər gün işə, məktəbə və bazara gedən sakinlər üçün bu yollar artıq çətinlik yox, sanki bir "idman meydançası"na çevrilib. Adam özünü gah "ekstremal yürüş yarışında", gah da kənd yollarında dəvə karvanı ilə səfərdə hiss edir.
