Quba–Xınalıq yoluna növbətçi briqadalar cəlb olunacaq. Bu barədə ShimalNews 6 yanvar tarixində Azərtac-a istinadən məlumat verir.
Azərbaycan Avtomobil Yolları Dövlət Agentliyinə məxsus briqadaların yerləşdirilməsinin səbəbi qarşıdakı günlərdə hava şəraitinin kəskin dəyişməsidir. Qabaqlayıcı tədbirlər olaraq, yollara səpilməsi üçün 100 tona yaxın qum-duz qarışığı ehtiyatı hazırlanıb, yolun qarla örtülən hissəsinin təmizlənməsi üçün ağır texnika cəlb edilib.
Təcrübəsiz, avtonəqliyyat vasitəsi hava şəraitinə uyğun təchiz edilməyən sürücülərin qarlı havada Quba-Xınalıq yolundan istifadə etmələri tövsiyə olunmur.
Milli Hidrometeorologiya Xidməti hava şəraitinin dəyişəcəyi haqqında xəbərdarlıq edib. Şimal və qərb rayonlarında yanvarın 7-si axşam saatlarından başlayaraq 12-dək hava şəraitinin dəyişəcəyi, yağıntılı olacağı, sulu qar, qar yağacağı gözlənilir. Gözlənilən yağıntılı və şaxtalı hava şəraiti ilə əlaqədar yolların buz bağlama ehtimalı var.
