Quba-Xaçmaz avtomobil yolunun Zərdabi qəsəbəsi ərazisindən keçən hissəsində nəzarətsiz buraxılan atlar sürücülər üçün ciddi təhlükə mənbəyinə çevrilib.
Məsələ ilə bağlı Shimal.News-a danışan yerli sakinlərin sözlərinə görə, atların nəzarətsiz şəkildə yollara çıxması yol-nəqliyyat hadisələrinin baş vermə riskini xeyli artırır.
Sakinlər bildiriblər ki, avtomobilin qarşısına qəfil çıxan atı vurmamaq üçün sürücülər ya kəskin əyləc verməli olur, ya da son anda istiqaməti dəyişərək qəzadan yayınmağa çalışırlar.
"At yola çıxıb qəza törədəndə, əgər hadisə kənd ərazisində baş verirsə, bəzi hallarda sürücüdən heyvanın pulunu tələb edirlər. Amma qəza kənddən kənarda olanda çox vaxt atın sahibi ortaya çıxmır, "heyvan mənim deyil" deyib məsuliyyətdən yayınır", - deyə sakinlər bildiriblər.
Onlar əsas məsuliyyəti ev heyvanlarını nəzarətsiz buraxan şəxslərdə görür və aidiyyəti qurumlardan bu məsələyə ciddi nəzarət etməyi tələb edirlər.
Qeyd edək ki, bu vəziyyət təkcə Quba rayonunda deyil, həmçinin Xaçmaz, İsmayıllı-Qaraməryəm-Şəki, Şəki-Oğuz və rayonun digər daxili yollarında da müşahidə olunur.
