Quba və İsmayıllıda qəbiristanlıqlara baxış keçirilib.
Shimal.News xəbər verir ki, Quba rayonu və İsmayıllı rayonunda Ombudsmanın bərabərlik hüququnun təmini və ayrı-seçkiliyin qarşısının alınması üzrə müstəqil monitorinq mexanizmi çərçivəsində qəbiristanlıqlara baxış keçirilib.
Azərbaycan Respublikasının İnsan Hüquqları üzrə Müvəkkili (Ombudsman) Aparatının yaydığı məlumata görə, monitorinqlər Bakı, Sumqayıt, Gəncə, Mingəçevir, Göygöl, Quba, İsmayıllı və Lənkəran daxil olmaqla bir sıra bölgələri əhatə edib. Baxışlar zamanı müxtəlif millətlərə və dinlərə mənsub şəxslərə aid qəbiristanlıqlar və memorial obyektlər yoxlanılıb.
Bildirilib ki, "Şəhərsalma və Memarlıq İli" çərçivəsində həyata keçirilən monitorinqlərin əsas məqsədi qəbiristanlıqların mövcud vəziyyətinin qanunvericiliyin və beynəlxalq öhdəliklərin tələblərinə uyğunluğunu qiymətləndirmək, eyni zamanda onların mühafizəsi və istifadəsində bərabərlik prinsipinə əməl olunmasını araşdırmaqdır.
Aparılan baxışlar zamanı ümumilikdə qanunsuz tikinti və ya təyinatdan kənar istifadə halları aşkar edilməyib. Bununla belə, bəzi ərazilərdə texniki xarakterli çatışmazlıqların mövcud olduğu qeyd olunub.
Məsələ ilə bağlı müvafiq qurumlara nəzarətin gücləndirilməsi, məlumatlandırıcı lövhələrin quraşdırılması, abadlıq işlərinin davam etdirilməsi və multikultural dəyərlərin təbliği istiqamətində tövsiyələr verilib.
