Qubanın təxminən 20 kəndi düz 24 gündür ki, işıqsız qalıb.
Aprelin 16-da yağan leysan xarakterli yağış və onun nəticəsində baş verən sel fəlakəti elektrik infrastrukturuna ziyan vurdu. Amma fəlakətdən 3 həftə keçməsinə baxmayaraq, nə Quba Rayon İcra Hakimiyyəti, nə də “Azərişıq” ASC ciddi bir addım atmayıb. Bu müddətdə hər iki qurumun bəhanələri bir-birini təkrar edir: “Yollar yararsızdır, əraziyə daxil olmaq mümkün deyil”.
Bu, sadəcə absurd bir bəhanədir. Çünki eyni yollarla bölgədə yaşayan və çətinlik içində qalan insanlar hər gün hərəkət edir, mal-qarasına yem aparır, məktəbə gedir, xəstəsini xəstəxanaya çatdırır. Bəs görəsən, texnikası, maddi-texniki imkanları və insan resursu olan dövlət qurumları həmin yollardan niyə keçə bilmir?
Əgər vəziyyət həqiqətən də bu qədər çətindirsə, nə üçün fövqəladə rejim elan edilmir? Nə üçün bu ərazilərə FHN cəlb edilmir? Nə üçün “Azərişıq” helikopter və ya alternativ texniki imkanlardan istifadə etmir? Sual çoxdur, cavab isə yox.
İşıqsız qalan kəndlərdə təkcə gecələr qaranlıq deyil – insanların ümidləri də qaralıb. Təsəvvür edin: məktəblərdə dərslər çətinliklə keçirilir, kənd camaatı soyuducusuz qalıb, telefonlar şarj olunmur, xəstə və yaşlı insanlar üçün zəruri olan elektriklə işləyən cihazlar işləmir. Bütün bunlar XXI əsrdə Bakıya 200 kilometr məsafədə baş verir.
İcra Hakimiyyətinin “vətəndaş məmnunluğu” siyasəti haradadır?! “Azərişıq”ın “operativ reaksiya” və “müasir yanaşma” prinsipləri hanı?!
Akif Rza
