Quba şəhərinin Qələbə küçəsində 2 ay əvvəl başlayan qazıntı işləri nəhayət başa çatıb. Shimal.News-un bu problemi işıqlandırmasının ardından rayon icra hakimiyyəti məsələyə müdaxilə edib və küçə asfaltlanıb.
Xatırladaq ki, yol təmir məqsədilə qazılsa da, uzun müddət asfaltlanmaması həm piyadalar, həm də sürücülər üçün ciddi çətinliklər yaradırdı. Xüsusilə, yağışlı havalarda küçədə hərəkət etmək mümkünsüz hala gəlmişdi. Lakin ictimaiyyətin və medianın diqqəti bu problemin tez bir zamanda həllini sürətləndirdi.
Qeyd edək ki, bir müddət əvvəl Quba rayonunun yollarının təmiri üçün dövlət tərəfindən 2 milyon manat vəsait ayrılıb. Görünən odur ki, bu vəsait hesabına şəhərin digər problemli yollarının da bərpası gözlənilir.
Shimal.News olaraq, vətəndaşların gündəlik qarşılaşdığı problemləri işıqlandırmağa və həll olunmasına töhfə verməyə davam edəcəyik!
