Vətəndaşların icbari tibbi sığorta sistemi çərçivəsində tibbi xidmətlərdən yararlanması elektron portal vasitəsilə həyata keçirilir. Lakin sistemdə yaranan texniki nasazlıqlar ciddi narazılığa səbəb olur.
Shimal.News-a daxil olan şikayətə görə, son iki gündür Quba Rayon Mərkəzi Xəstəxanasında elektron sistemin işləməməsi vətəndaşları çətin vəziyyətdə qoyub. Bildirilir ki, yaranmış problem səbəbindən həkim qəbuluna yazılmaq mümkün deyil.
Şikayətçilərin sözlərinə görə, sistem açılmadığı üçün pasiyentləri analiz və digər tibbi müayinələrə yönləndirmək mümkün olmur. Nəticədə xəstəxanada uzun növbələr yaranıb, vətəndaşlar saatlarla gözləməli olurlar.
İddialara əsasən, bəzi vətəndaşlar uzaq kəndlərdən acqarına analiz vermək üçün xəstəxanaya gəlsələr də, sistem işləmədiyi üçün müayinədən keçə bilməyiblər. Onlar yenidən gəlib-getməyin maddi baxımdan çətin olduğunu bildirirlər.
Məsələ xəstəxanada haqlı narazılıq yaradıb. Vətəndaşlar problemin qısa zamanda aradan qaldırılmasını və tibbi xidmətlərin fasiləsiz təmin olunmasını tələb edirlər.
Qeyd edək ki, analoji hal ötən həftə İsmayıllı Rayon Mərkəzi Xəstəxanasında da yaşanıb.
Məsələ ilə bağlı Tibbi Ərazi Bölmələrini İdarəetmə Birliyinə sorğu ünvanlamışıq.
