Məsələ ilə bağlı Shimal.News-a müraciət edən valideynlərin sözlərinə görə, 21 dekabr tarixində Xaçmazda keçirilməsi nəzərdə tutulan sınaq imtahanları ləğv edilsə də, bu barədə əvvəlcədən heç kimə məlumat verilməyib.

"Dünən yağışlı hava şəraitinə baxmayaraq, imtahan mərkəzinə yollandıq. Lakin orada bizə imtahanın keçirilməyəcəyi, ləğv edildiyi bildirildi. Halbuki imtahanın ləğvi ilə bağlı kurs tərəfindən bizə öncədən heç bir məlumat verilməmişdi", - deyə valideynlər bildiriblər.

Eyni hal Qubada yaşayan və sınaq imtahanı üçün ödəniş edən şagirdlərin də başına gəlib. Belə ki, əvvəlcə imtahanın saat 10:00-da, daha sonra isə 11:00-da keçiriləcəyi bildirilsə də, sınaq sonradan ləğv edilib.

"Uşaqlarımızı sınağın keçiriləcəyi ünvana aparıb orada gözlədik. İki dəfə imtahanın vaxtı dəyişdirildikdən sonra bizə yaxınlaşaraq sınağın təxirə salındığını dedilər", - deyə valideynlərdən biri narazılığını ifadə edib.

Qusardan olan izləyicimiz isə saat 11:00-da başlamalı olan imtahanın yalnız saat 13:00-da sual kitabçalarının paylanılması ilə başlandığını bildirib:

"Təsəvvür edin, uşaqlarımızı neçə saat gözlədiblər. Bu da azmış kimi, paylanılan materiallarda da səhvlər olub - sual kitabçası verilib, lakin cavab kartı təqdim edilməyib..."

Məsələ ilə əlaqədar olaraq Quba-Xaçmaz Regional Təhsil İdarəsi ilə əlaqə saxladıq. Verilən rəsmi məlumata əsasən, "Şahdağ" kursları tərəfindən keçirilən sınaq imtahanlarında müəyyən təşkilati çatışmazlıqlar olduğundan imtahanların keçirilməsi mümkün olmayıb.

Bildirilib ki, yaxın günlərdə imtahanlar yeni tarixdə təşkil ediləcək və ya ödəniş etmiş bütün vətəndaşların vəsaiti geri qaytarılacaq.

@shimalnews