İcra hakimiyyəti orqanlarında aparılan struktur dəyişikliyi Qubada da ixtirsarlara səbəb olub.
Oxu.az-ın məlumatına görə, həyata keçirilən dəyişikliklər nəticəsində icra hakimiyyətində 36 vəzifə ləğv edilib. Bununla da 36 əməkdaş tutduğu vəzifədən azad olunub.
Quba Rayon İcra Hakimiyyətinin başçısı İlqar Mahmudovun sərəncamı ilə həmin şəxslərin dövlət qulluğuna xitam verilib və onlar ehtiyat kadr siyahısına daxil ediliblər.
Məlumata əsasən, vəzifəsini itirənlərdən 31 nəfəri kənd inzibati ərazi dairəsi üzrə nümayəndə müavini və nümayəndəliklərin baş məsləhətçi–baş mühasibi vəzifəsində çalışıb. Digər şəxslər isə icra hakimiyyətində müxtəlif vəzifələrdə fəaliyyət göstəriblər.
Qeyd edək ki, bundan əvvəl analoji struktur dəyişiklikləri nəticəsində Ağsu Rayon İcra Hakimiyyətində 14, Tovuz Rayon İcra Hakimiyyətində 43, Cəlilabad Rayon İcra Hakimiyyətində isə 38 əməkdaş vəzifəsindən azad olunub.
