Quba rayonunun Qrız kəndi ilə rayon mərkəzi arasında əlaqə tamamilə kəsilib.
Sakinlər Shimal.News-a bildiriblər ki, kəndə aparan əsas iki yoldan biri torpaq sürüşməsi nəticəsində yararsız hala düşüb. Digəri isə son günlərdə yağan güclü qar səbəbindən bağlanıb.
Quba–Qəçreş–Xınalıq–Qrız yolunun təxminən 200 metrlik hissəsində baş verən sürüşmə səbəbindən hərəkət tam dayanıb. Ərazini canlı qüvvə ilə təmizləmək mümkün deyil. Nəticədə faktiki olaraq kənd artıq 7 gündür ki, blokada vəziyyətindədir.
Yerli əhali üçün ciddi çətinliklər yaranıb. Xəstələrin xəstəxanaya çatdırılması, ərzaq və digər zəruri ehtiyacların təmin olunması demək olar ki, mümkünsüzləşib. Bundan əlavə, fövqəladə hal təkrarlanarsa, operativ müdaxilənin imkansız olacağı qeyd olunur.
Sakinlər aidiyyəti qurumların məsələyə operativ reaksiya vermədiyini və yolların açılması istiqamətində hələlik real addımların atılmadığını bildirirlər. Mövcud vəziyyət isə bölgədə sosial və humanitar problemlərin dərinləşməsi riskini artırır.
