Azərbaycan Qida Təhlükəsizliyi Agentliyinin Şəki-Zaqatala regional bölməsinin fitosanitar müfəttişləri qəhvəyi mərmər bağacığına qarşı qışlama ocaqlarının aşkar və məhv edilməsi məqsədilə monitorinq tədbirlərini davam etdirirlər.
Agentliyin İnformasiya təminatı və innovativ həllər şöbəsindən Shimal.News-a verilən məlumata görə, monitorinqlər Balakən, Zaqatala və Qax rayonlarında həyata keçirilir.
Monitorinq zamanı zərərvericinin qışlama ehtimalı olan yaşayış evləri, yardımçı tikililər, anbarlar və təsərrüfat sahələri, eləcə də digər potensial sığınacaq yerlərinə baxış keçirilir. Aşkar edilən qəhvəyi mərmər bağacığı fərdləri mexaniki üsulla məhv olunur.
Eyni zamanda vətəndaşlarla maarifləndirici söhbətlər aparılır, zərərvericinin yaratdığı təhlükələr və düzgün mübarizə üsulları izah edilir, ictimaiyyətin həmin prosesdə fəal iştirakının vacibliyi vurğulanır.
Monitorinq və maarifləndirmə tədbirləri məktəblərdə, uşaq bağçalarında, kənd icra nümayəndəliklərində və insanların kütləvi toplaşdığı digər ictimai məkanlarda da aparılır.
