Bu gün şəhidlərimiz - İxtiyar Bayramov, Xaqani Nəsibov, Elməddin Mustafayev və Tural Məmmədovun doğum günüdür.
İxtiyar Bayram oğlu Bayramov 1 may 1998-ci ildə Quba rayonunun ucqar Qalaxudat kəndində anadan olub. Qalaxudat kənd tam orta məktəbində təhsil alıb. 2018-ci ilin iyul ayında həqiqi hərbi xidmətini başa vurduqdan sonra müxtəlif sahələrdə çalışıb. 2020-ci ilin avqust ayında gizir rütbəsi ilə yenidən Ordu sıralarına qayıdıb.
İxtiyar Bayramov 19 sentyabr 2023-cü ildə Ağdam rayonunun Gülablı kəndi istiqamətində şəhid olub.
O, "Füzulinin azad olunmasına görə", "Şuşanın azad olunmasına görə", "Xocavəndin azad olunmasına görə", "Vətən uğrunda" medalları və 3-cü dərəcəli "Vətənə xidmətə görə" ordeni ilə təltif edilib.
Xaqani Aydın oğlu Nəsibov 1 may 1991-ci ildə Balakən rayonunun Kortala kəndində anadan olub. O, 2011–2012-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət keçib.
Xaqani Nəsibov 2020-ci il sentyabrın 27-də başlayan Vətən müharibəsi zamanı Suqovuşanın azadlığı uğrunda gedən döyüşlərdə iştirak edib. O, 16 oktyabr 2020-ci ildə Suqovuşan döyüşləri zamanı şəhid olub.
"Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilib.
Elməddin Məhəmməd oğlu Mustafayev 1 may 2001-ci ildə Qəbələ rayonunda anadan olub. O, 5 iyul 2019-cu ildə həqiqi hərbi xidmətə yollanıb. Xidmətini Füzuli rayonunda davam etdirib.
Elməddin Mustafayev 2020-ci il sentyabrın 27-də başlayan Vətən müharibəsində iştirak edib, Füzulinin azad olunması uğrunda gedən döyüşlərdə vuruşub. O, 10 oktyabr 2020-ci ildə Füzuli istiqamətində gedən döyüşlərdə şəhid olub.
O, ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə", "Şuşanın azad olunmasına görə" və "Cəsur döyüşçü" medalları ilə təltif edilib.
Tural Arif oğlu Məmmədov 1 may 1995-ci ildə Oğuz rayonunun Sincan kəndində anadan olub. 2013-cü ildə Azərbaycan Silahlı Qüvvələrində müddətli həqiqi hərbi xidmət keçib. Həqiqi hərbi xidmətini başa vurduqdan sonra Azərbaycan Ordusunda xidmətini davam etdirib. 2016-cı ildə Aprel döyüşlərində iştirak edib.
Gizir Tural Məmmədov 2020-ci il sentyabrın 27-də başlayan İkinci Qarabağ müharibəsinin ilk günlərindən döyüşlərdə iştirak edib. O, 29 oktyabr 2020-ci ildə Ağdərə istiqamətində gedən döyüşlərdə qəhrəmancasına vuruşaraq şəhid olub.
O, "Vətən uğrunda", "Suqovuşanın azad olunmasına görə" və "Laçının azad olunmasına görə" medalları ilə təltif edilib.
