Qəbələ rayonunda fəaliyyət göstərən maye qazdoldurma məntəqəsində ciddi təhlükəsizlik pozuntuları aşkarlanıb.
Shimal.News xəbər verir ki, Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin əməkdaşları tərəfindən rayonun Zarağan qəsəbəsində fərdi sahibkar Sərdar Mehdiyevə məxsus maye qazdoldurma məntəqəsində planlı yoxlama aparılıb.
Yoxlama zamanı insan həyatı və sağlamlığı üçün təhlükə yarada biləcək bir sıra nöqsanlar müəyyən olunub.
Belə ki, istismarda olan iki ədəd maye qaz çəninin daxili baxış və hidravlik sınaqdan keçirilmədiyi məlum olub. Bundan əlavə, qoruyucu klapanların, maye qazın boşaldılması və balonların doldurulması zamanı istifadə olunan avadanlıqların dövri yoxlamalarının aparılmadığı aşkarlanıb.
Həmçinin məntəqədə bina və avadanlıqların torpaqlama müqavimətinin ölçülmədiyi də müəyyən edilib.
Aşkarlanan pozuntuların ciddi təhlükə yaratdığı nəzərə alınaraq, agentlik əməkdaşları tərəfindən qazdoldurma məntəqəsinin fəaliyyəti müvəqqəti dayandırılıb.
Pozuntuların aradan qaldırılması ilə bağlı tərtib olunan akt sahibkara təqdim edilib.
