Qəbələ şəhərində musiqi və incəsənət məktəblərinin müəllim və şagirdləri üçün ustad dərsləri təşkil olunub.
Shimal.News xəbər verir ki, tədbir Azərbaycan Respublikasının Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı və Şəki-Zaqatala Regional Mədəniyyət İdarəsinin dəstəyi ilə Qəbələ şəhərində fəaliyyət göstərən Uşaq incəsənət məktəbində keçirilib.
Fortepiano və tar ixtisaslarını əhatə edən ustad dərslərində Qəbələ rayonu və Oğuz rayonunda fəaliyyət göstərən musiqi və incəsənət məktəblərinin müvafiq ixtisaslar üzrə müəllim və şagirdləri iştirak ediblər.
Tədbirdə MEMİM-in şöbə müdiri, Əməkdar mədəniyyət işçisi Lalə Kərimova Asəf Zeynallının "Seçilmiş əsərlər" kitabını məktəbin kitabxanasına hədiyyə edib.
Fortepiano ixtisası üzrə ustad dərsini Üzeyir Hacıbəyli adına Bakı Musiqi Akademiyasının Fortepiano, orqan və klavesin kafedrasının müdiri, Əməkdar müəllim, pedaqogika üzrə fəlsəfə doktoru, professor Afaq Rüstəmova, tar ixtisası üzrə ustad dərsini isə Azərbaycan Dövlət Mədəniyyət və İncəsənət Universitetinin Xalq çalğı alətləri ifaçılığı kafedrasının müdiri, Əməkdar müəllim, dosent Umud İbrahimov aparıb.
Təcrübəli pedaqoqlar şagirdlərin ifası üzərindən musiqi alətlərinin ifa texnikası, səsləndirmə və diqqət yetirilməli məqamlar barədə danışaraq gənc musiqiçilərə tövsiyələr veriblər.
