Qubanın Alekseyevka kəndində yerləşən və nəqliyyat vasitələri üçün əsas arteriyalarından biri olan yol sanki mərmi atəşinə tutulub.
Bu barədə Shimal.News-a danışan sakinlər bildiriblər ki, təxminən iki ay əvvəl yol qazılaraq yararsız hala salınıb. Bir müddət sonra yalnız qısa bir ərazi təmir olunub və işlər yarımçıq saxlanılaraq texnika ərazidən çıxarılıb. Nəticədə uzun yol boyu faktiki olaraq cəmi bir zolaq ilə hərəkət etmək mümkündür.
"Bu yolu düzəltməyəcəkdinizsə, niyə qazıb getdiniz?", – deyə sürücülər və sakinlər narazılıqlarını ifadə edirlər.
Yolun dağılması avtomobillərin sıradan çıxmasına səbəb olur.
Qeyd edək ki, Alekseyevka kəndindən keçən bu yol Bakı–Quba və Quba–Xaçmaz magistrallarını birləşdirir. Buradakı dərin çuxurlar nabələd sürücülərin və onların sərnişinlərinin həyatını riskə atır.
Xatırladaq ki, Shimal.News ötən dövrlərdə burada yerləşən kənd məktəbində təhsilalan şagirdlərin valideynlərinin və ictimaiyyətin davamlı müraciətlərini işıqlandırıb. Bundan sonra buradan keçən yük avtomobillərinin hərəkətinə məhdudiyyət tətbiq edilib və müvafiq yol nişanı quraşdırılıb.
Alekseyevka kənd sakinləri aidiyyəti qurumlardan yarımçıq qalmış təmir işlərinin tamamlanmasını, məktəblilər və sürücülər üçün təhlükəsiz yol şəraitinin yaradılmasını xahiş edirlər.
