Qubanın Qamqam kəndində təxminən 10 ay əvvəl baş verən sel fəlakəti kənd sakinlərinin həyatını ciddi şəkildə çətinləşdirib.
Shimal.News xəbər verir ki, bu günədək çıxılmaz vəziyyətdə qalan sakinlər gediş-gəlişi təmin etmək üçün öz imkanları hesabına taxtadan müvəqqəti körpü inşa ediblər. Lakin həmin körpü təhlükəsizlik tələblərinə qətiyyən cavab vermir.
Yol infrastrukturunun yararsız hala düşməsi, eləcə də köhnə körpünün ətrafında torpaq yolun sürüşməsi xüsusilə məktəblilərin və yaşlı insanların gündəlik həyatını dözülməz həddə çatdırır.
Qeyd edək ki, ötən ilin aprel ayında Cağacuq çayına gələn güclü sel sözügedən fəsadlara səbəb olub. Həmin dövrdə Quba Rayon İcra Hakimiyyətindən bildirilib ki, təkcə Qamqam kəndində deyil, ümumilikdə şimal bölgəsində son günlər müşahidə olunan intensiv yağıntılar nəticəsində bir sıra yaşayış məntəqələrində sel və torpaq sürüşməsi halları qeydə alınıb:
"Yaranmış vəziyyət nəzarətdə saxlanılır və zəruri istiqamətlərdə fəsadların aradan qaldırılması, o cümlədən körpü ilə bağlı tədbirlərin görülməsi istiqamətində işlər mərhələli şəkildə aparılır".
Artıq iki aya yaxın vaxtdır ki, hadisənin üzərindən bir il tamam olur, lakin məsələ hələ də "nəzarətdə saxlanılır". Sakinlər həyatlarını riskə atmamaq üçün məsul qurumların konkret addımlar atmasını tələb edirlər.
