Prezident İlham Əliyev mayın 26-da Muğanlı-İsmayıllı-Qəbələ avtomobil yolunda görülən işlərlə tanış olub.
Shimal.News xəbər verir ki, Azərbaycan Avtomobil Yolları Dövlət Agentliyi layihə üzrə ümumilikdə 70 % işlərin icra edildiyini bildirib.
Bakı-Şamaxı-Muğanlı-İsmayıllı-Qəbələ avtomobil yolu əhalinin rahat gediş-gəlişində xüsusi əhəmiyyətə malik olmaqla paytaxt Bakını İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa magistral hesab edilir.
Məlumata görə, yolun ümumi uzunluğu 85,6 km-dir. Yenidənqurma nəticəsində yol 8,8 km qısalacaq. Yolboyu Ağsuçay çayı üzərində asma körpü inşa olunur. Körpüdə işlərin 40 %-i yerinə yetirilib. Körpüdən sonra yolun davamı olaraq uzunluğu 885 m olan tunelin tikintisi aparılır. Ümumilikdə yeni layihə üzrə yolboyu tunel və biri asma olmaqla 17 körpü layihələndirilib.
