Qəbələnin ucqar Quşlar kəndində sakinlər yolsuzluqdan əziyyət çəkirlər. Sakinlərin əsas narahatlığına səbəb yollarının bərbad vəziyyətdə olmasıdır.
Kanal S TV-nin məlumatına görə, kənd rayon mərkəzindən 40 km aralıda yerləşir. Sakinlər illərdir ki, gediş-gəlişdə əziyyət çəkirlər.
İnsanların ucqarda yaşamaları bir problemdirsə, yolsuzluq daha böyük və çətin məsələlərdən biridir. Xüsusən nəqliyyat vasitələrinin yollarda xarab olması onların maddi vəziyyətinə, ailə büdcəsinə xeyli təsir göstərir. Əvvəllər gediş-gəlişdə taksilərdən istifadə edilsə də son vaxtlar əsasən də yağışlı-qarlı, palçıqlı havalarda bu da mümkün deyil.
Sakinlərin sözlərinə görə, kənd yollarının təmir edilərək asfatlanacağına dair söz verilsə də bu elə vəd olaraq qalır.
Məsələ ilə əlaqədar Qəbələ rayon yol istismar idarəsindən bildirilib ki, mövcud problemdən, sakinlərin qayğısından xəbərdardırlar. Quşlarla yanaşı, yaxınlıqdakı daha bir neçə kəndin yol infrastukturunun yenilənməsi ilə bağlı məsələ müvafiq qaydada qaldırılıb. Bu məqsədlə maliyyə vəsaitinin ayrılması gözlənilir.
