“Qəbələ rayonu ərazisində baş verən yol-nəqliyyat hadisəsi zamanı xəsarət alan sürücülərdən biri sərxoş olub və onun avtomobil idarəetmə hüququ olmayıb”.
Oxu.az-ın məlumatına görə, bu açıqlamanı Baş Dövlət Yol Polisi İdarəsinin (BDYPİ) rəsmisi, polis polkovnik-leytenantı Mübariz Ağayev deyib.
“Tövlə kəndində baş verən hadisədə VAZ-2101 markalı, 27-BT-834 dövlət nömrə nişanlı avtomobilin sürücüsü Aqsif Yaşar oğlu Qəribli sükan arxasında sərxoş vəziyyətdə olub və onun avtomobil idarə etmə hüququ olmayıb.
Faktla bağlı cinayət işi başlanılıb, araşdırma aparılır. Hadisənin baş verməsində günahkar tərəfin kimliyini istintaq müəyyən edəcək.
BDYPİ bu hadisədə təqsirin kimdə olmasından asılı olmayaraq, nəqliyyat vasitələrinin sükanı arxasında sərxoş, eləcə də idarəetmə hüququ olmadan əyləşən şəxslərin əksər hallarda nəticəsi faciə ilə bitən kobud qayda pozuntularına yol verdiklərini bir daha xatırladır və bu kimi qanunazidd əməllərə meyilli olan şəxsləri ölüm və ağır xəsarətlərlə nəticələnən sözügedən hadisədən düzgün nəticə çıxarmağa çağırır”, - deyə M.Ağayev bildirib.
10:39
Qəbələ rayonunun Tövlə kəndində ağır yol qəzası baş verib.
Shimal.News məlumat verir ki, ötən gün saat 20:00 radələrində “VAZ-2106” və “VAZ-2101” markalı avtomobillər toqquşub.
Nəticədə birinci avtomobildə olan sərnişin - 67 yaşlı Ehsan Kərimov aldığı xəsarətlərdən hadisə yerində ölüb, digər sərnişin - 49 yaşlı Müslüm Soltanov və sürücü, 56 yaşlı Emin Muşdaqov xəsarət alıblar.
Həmçinin digər avtomobilin sürücüsü 30 yaşlı Aqasif Qəribli və 23 yaşlı sərnişini Elnur Cəbrayılov yaralanıblar.
DİN-in Mətbuat xidmətinin Şəki regional qrupundan bildirilib ki, faktla bağlı Qəbələ Rayon Polis Şöbəsində cinayət işi başlanılıb, araşdırmalar aparılır.
