Xəbər verdiyimiz kimi, Prezident İlham Əliyevin Sərəncamı ilə Milix İlxananoviç Yevdayev 1-ci dərəcəli "Vətənə xidmətə görə" ordeni ilə təltif edilib.
Milix Yevdayev Quba rayonunun Qırmızı Qəsəbəsində anadan olub. O, uşaqlıq və məktəb illərinin bu qəsəbədə keçdiyini, formalaşmasında müəllimlərinin böyük rol oynadığını bildirib.
Onun sözlərinə görə, Yevdayevlər ailəsi artıq bir neçə əsrdir Azərbaycanda yaşayır və bu torpağa dərin köklərlə bağlıdır.
Milix Yevdayev bildirib ki, atası İlxanan Yevdayev İkinci Dünya müharibəsində III Ukrayna cəbhəsində döyüşüb. Müharibədən sonra isə 40 il ərzində Qırmızı Qəsəbə və Qubada çörəkbişirmə sahəsində çalışıb.
Atası ehtiyacı olan insanlara pulsuz çörək paylayar, xeyirxahlığı ilə tanınardı. Məhz buna görə də Quba sakinləri ona "çörək ağacı" ləqəbini veriblər.
"Quba camaatı süfrəsinin ən müqəddəs nemətini yəhudi atama etibar edib. Bu, Azərbaycandakı qardaşlıq və dostluq mühitinin ən gözəl nümunəsidir. Atama "çörək ağacı" deyilməsi ilə həmişə fəxr etmişəm", - deyə Milix Yevdayev vurğulayıb.
Qeyd edək ki, Milix Yevdayev Qırmızı Qəsəbədəki 1 nömrəli tam orta məktəbi bitirib. Azərbaycan Politexnik İnstitutunun Texnologiya fakültəsində təhsil aldıqdan sonra müxtəlif dövlət qurumlarında mühəndis, texnoloq və rəhbər vəzifələrdə çalışıb. 2012-ci ildən isə Dağ Yəhudiləri Dini İcmasına rəhbərlik edir.
(Müsahibə: Apa)
