Quba rayonunun Ördüc kəndində aprelin 7-də yağan güclü yağışlar ciddi fəsadlara səbəb olub.
Shimal.News-un məlumatına görə, yağıntılar nəticəsində kəndi qəsəbə və rayon mərkəzi ilə birləşdirən yolun müxtəlif hissələrində torpaq sürüşməsi baş verib və yol tamamilə yararsız vəziyyətə düşüb.
Yol boyunca dərin yarğanlar əmələ gəlib, torpaq qatları parçalanaraq çökmə baş verib. Bəzi ərazilərdə isə yamac tam sürüşərək yolu bağlayıb, keçidi mümkünsüz edib. Nəticədə nəqliyyat vasitələrinin hərəkəti dayanıb.
Hazırda kənd sakinləri acınacaqlı vəziyyətdədir. Onlar rayon mərkəzinə gedə bilmir, gündəlik ehtiyacların təminində ciddi çətinliklərlə üzləşirlər.
Sakinlər aidiyyəti qurumlardan təcili müdaxilə və yolun bərpası üçün tədbir görülməsini xahiş edirlər.
