Ödənişli avtomobil yollarında motosikletlərlə hərəkətə görə tətbiq olunacaq yeni tariflər təsdiqlənib.
Shimal.News xəbər verir ki, Tarif Şurasının bu gün keçirilən iclasında avtomobil yollarının 1 kilometr ödənişli hissəsindən istifadə edən motosikletlər üçün tariflər müəyyən edilib.
Qərara əsasən, Əhmədbəyli–Füzuli–Şuşa avtomobil yolunda motosikletlərin hərəkəti üçün 1 kilometrə görə ödəniş 4,65 qəpik, M-1 Bakı–Quba–Rusiya Federasiyası ilə dövlət sərhədi avtomobil yolunda isə 5 qəpik təşkil edəcək.
Bildirilib ki, ödənişli yollardan əldə olunan vəsait avtomagistralların və ödəniş məntəqələrinin saxlanılması, qorunması və təmiri, həmçinin respublika və yerli əhəmiyyətli yolların yenidən qurulması, layihələndirilməsi və tikintisi ilə bağlı xərclərin maliyyələşdirilməsinə yönəldiləcək.
