Bakı-Quba-Rusiya Federasiyası ilə dövlət sərhədi ödənişli avtomobil yolundan istifadə üçün “Sürətli Keçid Kartı”nın satışına başlanılır.
Shimal.News xəbər verir ki, bu barədə “Azərbaycan Avtomobil Yolları Dövlət Agentliyi” (AAYDA) məlumat yayıb.
“Sürətli Keçid Kartı”nı Sumqayıt 2, Quba və Bakı şəhərlərindəki 2,5,6 və 7 saylı "ASAN xidmət" mərkəzlərindən, həmçinin Bakı-Quba-Rusiya Federasiyası ilə dövlət sərhədi avtomobil yolunun 45-ci km-da yerləşən satış məntəqəsindən, eyni zamanda Xudat-Qusar (ödənişli yolun sonuncu məntəqəsi) keçid ödəmə məntəqəsindən əldə etmək mümkündür.
Bunun üçün müraciət edən şəxs vəsiqəsini və nəqliyyat vasitəsinin qeydiyyat şəhadətnaməsini təqdim etməlidir.
“Sürətli Keçid Kartı”nın içərisində xüsusi çip var. Ödəmə keçid məntəqələrində quraşdırılmış xüsusi qurğular bu çipdəki məlumatları avtomatik olaraq oxuyur.
Kartları avtomobilin ön alın şüşəsinə (qoruyucu lentdən ayıraraq, sağ küncdə) yerləşdirmək kifayətdir.
Kartın balansını satış məntəqələrində və ya onlayn şəkildə artırmaq mümkündür.
Onlayn balans artırmaq üçün:
1. "www.tollroad.az" və ya "www.odenisliyol.az" saytına daxil olun.
2. "Balans artırma" bölməsinə keçid edin.
3. “Sürətli Keçid kartı”nın alışı zamanı sizə təqdim olunmuş qeydiyyat məlumatlarından istifadə edərək, hesabınıza daxil olun.
4. Bank kartı vasitəsilə ödəniş edin.
Balans artırma və “Sürətli Keçid kartı”nın satış əməliyyatını yalnız nağdsız şəkildə həyata keçirmək mümkündür.
“Sürətli Keçid kartı”nın istifadəsi zamanı yaranan çətinlik və ya kart zədələndiyi halda yuxarıda qeyd olunan satış məntəqələrinə və ya aidiyyəti ofislərə yaxınlaşmaq lazımdır.
Yaranmış çətinliklərlə bağlı dəstək xidməti fəaliyyət göstərir. Bunun üçün “www.tollroad.az”, “www.odenisliyol.az” veb saytları üzərindən müraciət edə və ya [email protected] e-mail ünvanına elektron məktubla məlumat vermək olar. Həmçinin *1009 “Qaynar xətt”inə də müraciət etmək mümkündür.
Qeyd edək ki, bir ay ərzində Bakı-Quba-Rusiya Federasiyası ilə dövlət sərhədi ödənişli avtomobil yolundan, eyni zamanda keçid məntəqələrində bank kartı vasitəsi ilə (nağdsız) ödəmə ilə istifadə etmək mümkün olacaq. Qeyd olunan müddət bitdikdən sonra isə ödənişli yoldan yalnız “Sürətli Keçid Kartı”nın sahibləri istifadə edə biləcəklər.
