Od çərşənbəsi Novruz bayramının ikinci çərşənbəsidir. Bu gün həmçinin "Üzgü çərşənbə" və "Adlı çərşənbə" kimi də tanınır.
Od qüdrət, qüvvət, işıq, azadlıq və ucalıq rəmzidir. Bu çərşənbədə tonqallar daha möhtəşəm şəkildə qalanır. İnanclara görə, alovun üzərindən tullanmaqla insan daxilindəki bütün ağırlıqları və xəstəlikləri yandırıb geridə qoyur. Həmçinin tonqalın yandırılması ilin isti və bərəkətli keçəcəyinə işarə sayılır.
Od çərşənbəsində axşam saatlarında həyət və məhəllələrdə tonqallar yandırılır, insanlar tonqal başına toplaşaraq növbə ilə üç dəfə alovun üzərindən tullanırlar. Bundan başqa, ailə üzvlərindən birini itirmiş evlərin qarşısında da tonqal qalanır. İnama görə, od yandırmaq həmin ailənin saxladığı yas mərasiminin başa çatdığını bildirir.
