Xudat-Nabran istirahət zonasında yerləşən pulsuz çimərliklərdə antisanitar vəziyyət yaranıb.
Bu barədə Shimal.News-a müraciət edən sakinlər bildiriblər ki, hər il olduğu kimi bu mövsümdə də pulsuz çimərlik ərazilərində zibil qutusu yerləşdirilməyib. Nəticədə istirahətə gələnlərin bir qismi tullantıları toplamaq əvəzinə sahildə qoyaraq ərazini çirkləndirir.
Sakinlərin sözlərinə görə, sahildə qida qalıqları, plastik qablar və digər məişət tullantıları günlərlə təmizlənmədiyindən həm antisanitar vəziyyət yaranır, həm də çimərliyin görünüşünə mənfi təsir göstərir.
Onlar aidiyyəti qurumlardan çimərlik ərazilərində zibil qutularının yerləşdirilməsini, təmizliyin mütəmadi təmin edilməsini və nəzarətin gücləndirilməsini tələb edirlər.
