TƏBİB tabeliyində fəaliyyət göstərən xəstəxanalarda çalışan əməkdaşların gecikən əməkhaqları ilə bağlı narazılığı aradan qaldırılıb.
Shimal.News xəbər verir ki, saytımızda məsələ ictimailəşdirildikdən sonra Bakı şəhəri, eləcə də Şimal bölgəsi və digər rayonlarda fəaliyyət göstərən dövlət xəstəxanalarının əməkdaşlarına aprel ayı üzrə gecikən maaşlar ödənilib.
Xatırladaq ki, işçilər əməkhaqlarının müqavilədə nəzərdə tutulduğu kimi ayın 10-dək verilmədiyini, gecikmələrin artıq mütəmadi hal aldığını bildirirdilər. Onların sözlərinə görə, yaranmış vəziyyət kredit öhdəliklərinin icrasında çətinlik yaradır, ailələrin sosial durumuna mənfi təsir göstərirdi.
Narazı əməkdaşlar həmçinin maaşların gecikməsinə baxmayaraq bununla bağlı heç bir kompensasiya tətbiq olunmadığını qeyd etmişdilər.
Məsələnin gündəmə gətirilməsindən sonra əməkhaqlarının köçürüldüyü bildirilir. İşçilər problemin həll olunmasını müsbət qiymətləndirsələr də, gələcəkdə bu cür gecikmələrin təkrarlanmamasını istəyirlər.
