Çoxsaylı müraciətlər nəzərə alınaraq lisey və gimnaziyalara qəbul üzrə qeydiyyat müddəti 21 iyun saat 15:00-dək uzadılıb.
Shimal.News-a bu barədə Təhsil İnstitutundan məlumat verilib.
Qeydiyyatdan keçmək üçün valideynlər (və ya qanuni nümayəndələr) şəxsi kabinetlərində "Sorğu yerləşdir" bölməsinə daxil olaraq öncə "Mərkəzi imtahanla qəbul" düyməsini, sonra isə imtahan keçiriləcək mərkəzi və müvafiq məlumatları seçməlidirlər.
Qeyd edək ki, lisey və gimnaziyalara qəbul ildə bir dəfə – tədris ili başlamazdan əvvəl "Şagirdlərin elektron yerdəyişməsi" (sy.edu.az) sistemi vasitəsilə qeydiyyatdan keçmiş və imtahanda iştirak hüququ qazanmış şagirdlər üçün təşkil olunur.
İmtahanda şagirdlərə tədris dili və riyazi təfəkkürü ölçən müxtəlif tipli suallar təqdim edilir. Müvafiq bal toplayan şagirdlər seçim mərhələsinə buraxılır. Qəbul olunan şagirdlər üçün sistemdə avtomatik sorğular yaradılır və sənəd qəbulu prosesi aparılır. Lisey seçimi 2 mərhələdə, ehtiyac olduqda isə 3 mərhələdə həyata keçirilir.
Mərkəzləşdirilmiş qaydada şimal rayonları üzrə qəbul aparılacaq lisey və gimnaziyaların siyahısı:
Quba rayonu fizika, riyaziyyat və informatika təmayüllü lisey;
Xaçmaz şəhəri akademik Zərifə Əliyeva adına 8 nömrəli təbiət fənləri təmayüllü lisey;
Oğuz şəhəri Emin Abdullayev adına 2 nömrəli internat tipli texniki və təbiət fənləri təmayüllü lisey;
Şəki şəhəri kimya və biologiya təmayüllü lisey;
Zaqatala şəhəri akademik Zərifə Əliyeva adına texniki fənlər təmayüllü lisey;
Şamaxı rayonu texniki, humanitar və təbiət fənləri təmayüllü internat tipli lisey;
İsmayıllı şəhəri internat tipli "Talıstan" liseyi;
Hər bir müəssisə haqqında ətraflı məlumatı "Şagirdlərin elektron yerdəyişməsi" portalında "Mərkəzi imtahanlı liseylər" bölməsindən əldə edə bilərsiniz.
Bütün iştirakçılara uğurlar arzulayırıq!
Ötən il istifadə olunan imtahan kitabçası aşağıdakı linkdə yerləşdirilib.
Kitabça 6-cı sinif (7-ci sinfə qəbul)
