Quba rayonunun Yerfi kəndində ayıların yaşayış məntəqəsinə təcavüzü sakinləri çıxılmaz vəziyyətə salıb.
Shimal.News-a daxil olan məlumata görə, son günlər yırtıcı heyvanlar kəndlilərə ciddi ziyan vururlar.
Bir gün öncə ayılar 3 ailənin həyətinə girərək arı yeşiklərini dağıdıb, bostan sahələrini yararsız hala salıblar.
"Ayılar artıq evlərin həyətinə qədər gəlir. Bizdən başqa daha üç ailənin bağına giriblər. Bir qonşunun 5, digərinin 3 arı ailəsini məhv ediblər. Bizim təsərrüfatı isə tamamilə dağıdıblar. Axşam saat 9-dan sonra pəncəlilər kəndin içində rahat gəzirlər, insanlar həyətə çıxmağa qorxur. Heç bir qurum məsələyə baxmır, nəzarət və köməklik göstərilmir", – deyə sakinlər bildirirlər.
Kənd sakinləri bildirirlər ki, məsələ artıq təkcə maddi ziyanla məhdudlaşmır. Ayıların yaşayış evlərinə bu qədər yaxınlaşması insanların, xüsusilə uşaqların və yaşlıların həyatı üçün ciddi təhlükə yaradır.
Yerfi sakinləri Ekologiya və Təbii Sərvətlər Nazirliyini, Quba Rayon İcra Hakimiyyətini və digər aidiyyəti qurumları təcili tədbir görməyə çağırırlar. Onlar xəbərdarlıq edirlər ki, vaxtında tədbir görülməsə, növbəti dəfə zərər təsərrüfata deyil, insan həyatına dəyə bilər.
