Əkin-biçin mövsümünün başlaması ilə avtomobil yollarında kənd təsərrüfatı texnikalarının sayının artması yol hərəkəti təhlükəsizliyi ilə bağlı riskləri də gündəmə gətirib.
Shimal.News xəbər verir ki, Baş Dövlət Yol Polisi İdarəsi kənd təsərrüfatı texnikalarından istifadə edən hüquqi və fiziki şəxslərə xəbərdarlıq edib.
İdarə bildirir ki, texniki cəhətdən istifadəyə yararsız, xarici işıq cihazları nasaz, tələblərə zidd əlavə avadanlıq quraşdırılmış və ya dövlət qeydiyyat nişanı olmayan texnika ilə yük və sərnişin daşınması ciddi təhlükə yaradır.
Xüsusilə əkin sahələrində çalışan insanların qanunvericiliyin tələblərinə uyğun təchiz edilməmiş yük avtomobillərində, traktor və qoşqularda daşınmasının ağır nəticəli qəzalara səbəb ola biləcəyi vurğulanır.
Bundan başqa, ot kütləsinin və müxtəlif kənd təsərrüfatı məhsullarının qablaşdırılmadan, müəyyən edilmiş çəki və ölçü hədləri aşılmaqla daşınmasının da təhlükə yaratdığı bildirilir.
Baş Dövlət Yol Polisi İdarəsi kənd təsərrüfatı fəaliyyəti ilə məşğul olan şəxsləri əməkdaşların daşınması və məhsulların nəqli zamanı yol hərəkəti təhlükəsizliyi qaydalarına ciddi əməl etməyə çağırıb.
Qurum qeyd edib ki, kənd təsərrüfatı texnikalarına və onların yollarda hərəkətinə nəzarət tədbirləri gücləndirilib.
