Quba rayonunun İkinci Nügədi kəndində yolların və elektrik dirəklərinin vəziyyəti sakinlərin narazılığa səbəb olur.
Shimal.News-a danışan sakinlərin sözlərinə görə, kəndin daxili yolu boyunca çoxsaylı dərin çuxurlar yaranıb.
Yağıntılı havalarda isə yollar demək olar ki, keçilməz hala düşür. Bu çuxurlar yağış suları ilə dolaraq həm piyadalar, həm də nəqliyyat vasitələri üçün ciddi problem yaradır. Avtomobillər tez-tez zədələnir.
Bundan əlavə, kənddəki elektrik dirəklərinin vəziyyəti də narahatlıq doğurur. Bəzi dirəklər köhnəlib, aşınmış vəziyyətdədir və əlavə dayaqlarla, məftillərlə bərkidilməyə çalışılıb. Bu isə onların dayanıqlılığının zəif olduğunu göstərir.
Kənd əhalisi ümid edir ki, məsələ qısa zamanda diqqət mərkəzinə götürüləcək, yollar təmir ediləcək və təhlükə yaradan elektrik dirəkləri yeniləri ilə əvəz olunacaq.
