Bir sıra kolleclərdə kadr təyinatları həyata keçirilib.
Shimal.News məlumat verir ki, Səbuhi Qurbanov Azərbaycan Texniki Universitetinin nəzdində fəaliyyət göstərən Bakı Dövlət Rabitə və Nəqliyyat Kollecinin tədris işləri üzrə direktor müavini, Vüqar Mikayıllı isə İsmayıllı Dövlət Humanitar və Texnologiya Kollecinin tərbiyə işləri üzrə direktor müavini vəzifəsinə təyin edilib.
Səbuhi Qurbanov əmək fəaliyyətinə Şəki şəhər 11 saylı orta məktəbdə riyaziyyat müəllimi kimi başlayıb. Sonrakı illərdə həmin məktəbdə direktor müavini, Şəki şəhər 20 saylı orta məktəbdə direktor, həmçinin Şəki-Zaqatala Regional Təhsil İdarəsində baş məsləhətçi vəzifələrində çalışıb.
O, 2016-cı ildə Azərbaycan Respublikası Prezidentinin sərəncamı ilə "Tərəqqi" medalı ilə təltif olunub.
Vüqar Mikayıllı bakalavriat və magistratura təhsilini Bakı Dövlət Universitetində "Regionşünaslıq" ixtisası üzrə alıb. Hazırda ADA Universitetində "Təhsil üzrə menecment" ixtisası üzrə magistratura təhsilini davam etdirir.
Əmək fəaliyyətinə Qobustan şəhər 3 saylı tam orta məktəbdə tarix müəllimi kimi başlayan V. Mikayıllı müxtəlif illərdə Respublika Fənn Olimpiadalarının rayon (şəhər) mərhələlərində Şamaxı rayonu üzrə imtahan rəhbəri, Qobustan rayonu üzrə monitorinq rəhbəri, həmçinin TIMSS beynəlxalq qiymətləndirməsi üzrə Qobustan rayonu üzrə imtahan rəhbəri kimi fəaliyyət göstərib.
Yeni təyinatların kollec təhsilinin keyfiyyətinin yüksəldilməsinə və idarəetmənin təkmilləşdirilməsinə töhfə verəcəyi gözlənilir.
