Bakının Xəzər rayonunda ər-arvad arasında baş verən mübahisə məhkəmə araşdırmasına qədər uzanıb.
Demokrat.az-ın məlumatına görə, hadisə ailənin yaşadığı evdə qeydə alınıb. Xaçmaz rayonundan olan 1968-ci il təvəllüdlü kişi həyat yoldaşı ilə mübahisə zamanı ona fiziki xəsarət yetirib.
Hadisədən sonra fakt üzrə Cinayət Məcəlləsinin qəsdən sağlamlığa zərər vurmanı nəzərdə tutan 128-ci maddəsi ilə cinayət işi başlanıb.
Təqsirləndirilən şəxs istintaq və məhkəmə zamanı özünü təqsirli bildiyini, törətdiyi əməldən peşman olduğunu və həyat yoldaşı ilə barışdığını deyib.
Zərərçəkmiş qadın da məhkəməyə təqdim etdiyi ərizədə həyat yoldaşı ilə barışdığını, ona qarşı hər hansı şikayət və tələbinin olmadığını qeyd edib.
İşə baxan Xəzər Rayon Məhkəməsi tərəflərin barışdığını və dəymiş ziyanın ödənildiyini nəzərə alaraq təqsirləndirilən şəxsi cinayət məsuliyyətindən azad edib.
Məhkəmənin qərarına əsasən, cinayət işi üzrə icraata xitam verilib.
