Xaçmaz şəhərində ictimai nəqliyyat dayanacaqları ilə bağlı problem yaşanır.
Shimal.News redaksiyasına Xaçmaz şəhərində ictimai nəqliyyat xidmətlərinin təşkili ilə bağlı vətəndaş şikayəti daxil olub.
Məlumata görə, şəhərdə marşrut avtobusları üçün xüsusi dayanacaqlar və ya dayanacaq işarələri mövcud deyil.
Vətəndaş şikayətində bildirilir ki, şəhərdaxili marşrutlardan istifadə etmək istəyən sakinlər və şəhərə gələn qonaqlar ictimai nəqliyyatın dayanacaq nöqtələrini müəyyən etməkdə çətinlik çəkirlər.
Belə ki, marşrut avtobuslarının harada dayandığını bilməyən şəxslər küçədən keçən yerli sakinlərdən bu barədə məlumat soruşmağa məcbur olurlar.
Qeyd edək ki, ictimai nəqliyyat dayanacaqlarının işarələrlə təmin edilməsi şəhər infrastrukturunun vacib tərkib hissəsidir və sakinlərin rahatlığını təmin etməklə yanaşı, şəhərdə nəqliyyat axınının düzgün təşkilinə də xidmət edir.
