Bu gün Aktau yaxınlığında baş verən aviasiya qəzasının üzərindən bir il keçir.
2024-cü il dekabrın 25-də Azərbaycan Hava Yollarına məxsus J2-8243 nömrəli Bakı-Qroznı reysini yerinə yetirən "Qusar" "Embraer E190AR" təyyarəsi Qazaxıstanın Aktau şəhərindən təxminən 3 kilometr aralıda qəza enişi edib.
Təyyarə saat 07:56-da Bakıdan havaya qalxıb. Qroznıda pis hava şəraiti səbəbindən reys əvvəlcə Mahaçqalaya, daha sonra Aktauya yönləndirilib. Ekipaj saat 08:35-də idarəetmə sistemində nasazlıqla bağlı qəza siqnalı verib, saat 08:49-da isə Aktauda təcili eniş tələb edib. Lakin saat 10:28-də təyyarə yerə çırpılıb.
Qəza zamanı göyərtədə 62 sərnişin və 5 ekipaj üzvü olmaqla 67 nəfər olub. Hadisə nəticəsində 38 nəfər həlak olub, 29 nəfər, o cümlədən iki uşaq xəsarət alıb.
Həlak olan ekipaj üzvləri - İqor Kşnyakin, Aleksandr Kalyaninov və Hökümə Əliyevaya ölümündən sonra Azərbaycanın Milli Qəhrəmanı adı verilib. Xəsarət alan bələdçilər Zülfüqar Əsədov və Aydan Rəhimli I dərəcəli "Rəşadət" ordeni ilə təltif olunublar.
Faktla bağlı Azərbaycan, Qazaxıstan və Rusiyada cinayət işləri başlanıb. Hadisə ilə əlaqədar dekabrın 26-da Azərbaycanda, 28-də isə Çeçenistanda matəm elan edilib. Dekabrın 28-də Rusiya Prezidenti Vladimir Putin Prezident İlham Əliyevə zəng edərək üzrxahlıq edib.
