Shimal.News məlumat verir ki, bu barədə Səhiyyə Naziri Teymur Musayev "Azərbaycan Əczaçılıq Sənayesi: Dünən, Bu Gün və Sabah" II Beynəlxalq Konfransında çıxışı zamanı məlumat verib.

Nazir bildirib ki, rəqəmsallaşma tədbirləri çərçivəsində elektron resept platforması istifadəyə verilib. Paralel olaraq, dərman vasitələrinin dövriyyəsinə nəzarətin gücləndirilməsi məqsədilə Təqib və İzləmə Sisteminin mərhələli tətbiqinə başlanılıb.

Qeyd olunub ki, ilkin mərhələdə psixotrop və güclü təsir edən dərman vasitələrinin izlənməsi həyata keçirilib. Qısa müddət ərzində ölkə üzrə tibb müəssisələri, topdan və pərakəndə əczaçılıq obyektləri sistemə inteqrasiya olunaraq koordinasiyalı fəaliyyət təmin edilib.

Nazirin sözlərinə görə, sistemin əsas məqsədi əhalinin sağlamlığının qorunması ilə yanaşı, nəzarət mexanizmlərinin təkmilləşdirilməsi və sahibkarlar üçün biznes proseslərinin sadələşdirilməsidir. Bu yanaşmanın səhiyyə sistemində ümumi səmərəliliyi artırdığı vurğulanıb.

Eyni zamanda bildirilib ki, əczaçılıq sahəsində aparılan islahatlar təhsil istiqamətində də yenilikləri zəruri edir. Bu çərçivədə Azərbaycan Tibb Universitetinin əczaçılıq fakültəsi ölkədə aparıcı elmi-tədqiqat mərkəzlərindən birinə çevrilib, müasir laboratoriya infrastrukturu yaradılıb və tələbələrin praktiki hazırlığı üçün istehsalat bazaları genişləndirilib.

Nazir əlavə edib ki, ötən il Azərbaycan Tibb Universiteti, "Scandens", Peç Universiteti və "Panon Pharma" arasında imzalanmış memorandum çərçivəsində mütəxəssislər üçün müxtəlif təlim və təcrübə proqramlarının həyata keçirilməsi nəzərdə tutulur.

Sonda vurğulanıb ki, əczaçılıq sektorunda aparılan islahatlar nəticəsində əhalinin keyfiyyətli və təhlükəsiz dərman vasitələrinə çıxışı genişlənir və ümumilikdə səhiyyə sisteminin inkişafına töhfə verilir.