Son günlər yağan intensiv yağışlar Quba rayonunda fəsadlara səbəb olub.
Shimal.News xəbər verir ki, rayonun İkinci Nügədi kəndində yerləşən Çənlibel gölündə suyun səviyyəsi kəskin yüksəlib və göl daşıb.
Sakinlərin sözlərinə görə, buna səbəb əraziyə daxil olan sel suları olub. Nəticədə gölün yaxınlığında yerləşən tanınmış istirahət mərkəzinin bəzi tikililəri su altında qalıb.
Qeyd edək ki, Çənlibel gölü ötən əsrin 50-ci illərində əkin sahələrinin suvarılması məqsədilə yaradılıb. Gölün sahəsi təxminən 10 hektar, dərinliyi isə 10–15 metr təşkil edir. Qış aylarında şaxtalı havalarda onun səthində buz örtüyü də əmələ gəlir.
