Bu gün Novruz çərşənbələrindən üçüncüsü "Hava çərşənbəsi", "Külək çərşənbəsi", "Yelli çərşənbə", "Külək oyadan çərşənbə" adları ilə tanınan Yel çərşənbəsidir.
İlaxır çərşənbənin üçüncüsünün küləklə bağlanması qədim zamanlardan mövcuddur. Şifahi xalq yaradıcılığında yelin müqəddəsliyi, ucalığı, qüdrəti ilə bağlı müxtəlif nəğmə, əfsanə, inanc, atalar sözü, bayatılar, tapmacalar var.
Folklor nümunələrində və dastanlarda, həmçinin qədim etiqadlarda Yer üzündə küləyin iki rəngi göstərilir: qara və ağ. Hətta deyimlərdə belə bir ifadə var ki, hansı qarğışdan, xoşa gəlməyən ifadədən narazılıq yaranarsa, deyərlər: "Ağzından qara yellər aparsın". Yaxud da elə, obaya, ailəyə, nəslə xeyir-dua verəndə söyləyərlər: "Üstünüzə ağ yellər əssin".
Yel çərşənbəsi günü tonqallar qalanır, evlərdə müxtəlif yeməklər bişirilir. İnsanlar Novruz bayramına hazırlıq görürlər.
