Bu gün Azərbaycanda Novruz bayramının müjdəçisi sayılan Torpaq çərşənbəsi qeyd olunur.
Bu çərşənbə dörd çərşənbənin sonuncusudur. Hansı ki, eləcə də "Yer çərşənbəsi" və "İlaxır çərşənbə" kimi də tanınır. Xalq inanclarına görə, bu çərşənbə torpağın isinib oyanmasını, təbiətin canlanmasını və baharın gəlişini simvolizə edir.
Qədim adətlərə əsasən, İlaxır çərşənbə günü insanlar torpaq sahələrinə çıxar, həyət-bacalarını təmizləyər, yaz əkininə hazırlıq görərdilər. Bu gün həm də bolluq və bərəkətin rəmzi hesab olunur.
Axşam saatlarında isə bayram ənənələri daha rəngarəng şəkildə qeyd olunur. İnsanlar tonqallar qalayır, üzərlik yandırır, məşəllər alışdırır, müxtəlif oyunlar və şənliklər təşkil edirlər. Həmçinin küsülülərin barışması, evlərdə bayram süfrələrinin açılması və ailə üzvlərinin bir araya gəlməsi də İlaxır çərşənbənin əsas ənənələrindən sayılır.
Bu gecə uşaqlar və gənclər arasında qapı pusmaq, qulaq falına çıxmaq, bacadan torba sallamaq və qurşaq atmaq kimi qədim adətlər də yerinə yetirilir. Bütün bu mərasimlər Novruzun gəlişini böyük sevinclə qarşılamağın simvolu hesab olunur.
Torpaq çərşənbəsi ilə birlikdə Novruz hazırlıqları daha da sürətlənir və ölkənin müxtəlif bölgələrində bayram şənlikləri keçirilir. Novruz bayramı isə hər il olduğu kimi martın 20-də qeyd olunur.
