Bu gün əslən Qubadan olan, Vətən müharibəsi şəhidi Miqdad Abduləlimovun doğum günüdür.
Miqdad Abduləlimov 23 mart 2002-ci ildə Quba rayonunda anadan olub. Orta məktəbi başa vurduqdan sonra 2019-cu ildə Bakı Dövlət İqtisad Kollecinə qəbul olunub. 2020-ci ildə hərbi xidmətə çağırılan Miqdad təhsilini donduraraq Vətənə xidmətə yollanıb.
Azərbaycan Ordusunun əsgəri olan Miqdad Abduləlimov 2020-ci il sentyabrın 27-də başlanan Vətən müharibəsində iştirak edib. O, xüsusilə Tərtər istiqamətində gedən döyüşlərdə igidliklə vuruşub və sentyabrın 28-də döyüş tapşırığını yerinə yetirərkən qəhrəmancasına şəhid olub.
Miqdad Abduləlimov göstərdiyi şücaətə görə ölümündən sonra Azərbaycan Prezidenti İlham Əliyevin sərəncamları ilə "Vətən uğrunda", "Laçının azad olunmasına görə", "Suqovuşanın azad olunmasına görə" medalları və III dərəcəli "Vətənə xidmətə görə" ordeni ilə təltif edilib.
Onun xatirəsi daim ehtiramla anılır və xalqımızın yaddaşında yaşayır.
