Bu gün Azərbaycan Respublikasının ərazi bütövlüyü uğrunda canından keçən Daxili Qoşunların hərbi qulluqçusu Altun Tağı oğlu Əliyevin doğum günüdür.
Shimal.News xatırladır ki, Altun 24 mart 2002-ci ildə Quba rayonunun Təngəaltı kəndində anadan olub. O, təhsilini doğulduğu kəndin orta məktəbində alıb, daha sonra Bakı Avrasiya Universitetində ali təhsilini başa vurub.
Vətənə bağlılığı və hərbçi olmaq arzusu ilə seçilən Altun Əliyev xidmət dövründə yüksək peşəkarlıq, şücaət və mərdlik nümayiş etdirib. Daxili Qoşunların hərbi qulluqçusu, MAHHXHQ rütbəli Altun Əliyev Qarabağda həyata keçirilən lokal antiterror əməliyyatları zamanı qəhrəmancasına şəhid olub.
O, Ağdam və Ağdərə istiqamətlərində gedən döyüşlərdə iştirak edib və sentyabrın 19-da Ağdərə ərazisində aparılan hərbi əməliyyat zamanı şəhidlik zirvəsinə ucalıb. Şəhid Quba rayonunun Təngəaltı kənd qəbiristanlığında dəfn edilib. Subay idi.
Göstərdiyi qəhrəmanlığa görə Azərbaycan Prezidenti İlham Əliyevin sərəncamına əsasən Altun Əliyev ölümündən sonra III dərəcəli "Vətənə xidmətə görə" ordeni ilə təltif edilib.
Ailəsinin sözlərinə görə, Altun mehriban, ailəcanlı və vətənpərvər bir gənc olub. Məktəbdə müəllimlərinin və dostlarının sevimlisi idi. Onun ən böyük arzusu ali savadlı, peşəkar hərbçi olmaq idi.
Altun Əliyevin xatirəsi onu tanıyanların qəlbində daim yaşayır.
