Bu gün şəhidlərimiz - Emral Həsənov, Aqil Həsənov və Tamerlan Səfərovun doğum günləridir.
Emral Vüqar oğlu Həsənov 2002-ci il yanvarın 6-da Quba rayonunun Səbətlər kəndində anadan olub.
O, Elman Məmmədov adına Səbətlər kənd orta məktəbində təhsil alıb. 2020–2021-ci illərdə həqiqi hərbi xidmətdə olub. Azərbaycan Ordusunun əsgəri kimi İkinci Vətən müharibəsində iştirak edib.
Döyüşlər zamanı iki dəfə yüngül yaralansa da, döyüş yolunu davam etdirib. İkinci Vətən müharibəsindən iki il sonra hərbi xidmətini başa vuraraq ailəsinə qayıdıb. Bir müddət müxtəlif sahələrdə çalışıb.
Emral Həsənov 2023-cü il sentyabrın 19-da Azərbaycan Ordusunun Qarabağ iqtisadi rayonunda keçirdiyi lokal xarakterli antiterror tədbirləri zamanı qəhrəmancasına şəhidlik zirvəsinə ucalıb.
O, "Füzulinin azad olunmasına görə" medalı və III dərəcəli "Vətənə xidmətə görə" ordeni ilə təltif edilib.
Aqil Nofəl oğlu Həsənov 1996-cı il yanvarın 6-da Şabran rayonunun Pirəmsən kəndində anadan olub.
Azərbaycan Ordusunun leytenantı olan Aqil Həsənov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi uğrunda başlanan Vətən müharibəsində iştirak edib. O, 2020-ci il sentyabrın 29-da şəhid olub.
Aqil Həsənov ölümündən sonra "Vətən uğrunda", "Füzulinin azad olunmasına görə", "Döyüşdə fərqlənməyə görə" və "İgidliyə görə" medalları ilə təltif edilib.
Tamerlan Cavad oğlu Səfərov 2001-ci il yanvarın 6-da Quba şəhərində anadan olub. O, 2019-cu ildən etibarən Azərbaycan Silahlı Qüvvələrinin sıralarında müddətli həqiqi hərbi xidmətdə xidmət edib.
Tamerlan Səfərov 2020-ci ildə baş vermiş Vətən müharibəsi zamanı Ağdərə istiqamətində gedən döyüşlərdə iştirak edib və 2020-ci il oktyabrın 9-da Ağdərə istiqamətində şəhid olub.
O, ölümündən sonra "Vətən uğrunda", "Suqovuşanın azad olunmasına görə" və "Cəsur döyüşçü" medalları ilə təltif edilib.
