Bu gün – 9 May bütün keçmiş SSRİ məkanında faşizm üzərində Qələbə Günü kimi qeyd olunur. 1941-ci il iyunun 22-də faşist Almaniyasının Sovet İttifaqına hücumu ilə başlayan Böyük Vətən müharibəsi milyonlarla insanın həyatına son qoyub. Dörd il davam edən qanlı savaş 1945-ci il mayın 9-da Berlinin alınması və Almaniyanın kapitulyasiyası ilə başa çatıb.
Müharibə illərində Azərbaycandan 600 mindən çox insan cəbhəyə yollanıb. Onların təxminən yarısı doğma yurda geri dönməyib. Azərbaycan nefti, sənaye müəssisələri və arxa cəbhədə çalışan minlərlə insan da qələbənin qazanılmasında mühüm rol oynayıb.
Şimal və şimal-qərb bölgələrinin rayonları da müharibədə böyük itkilər verib. Qusar rayonundan 10 min 125 nəfər səfərbər olunub, onların 3905-i geri qayıtmayıb; Xaçmaz rayonundan 8930 nəfər müharibəyə göndərilib, 2496 nəfər həlak olub, 360 nəfər isə itkin düşüb; Quba rayonundan 15 min 214 nəfər cəbhəyə yollanıb, onların 5579-u həlak olub və ya itkin düşüb; Şamaxı, İsmayıllı, Ağsu, Xızı, Qəbələ, Oğuz və Qax rayonlarından cəbhəyə yollanan yüzlərlə insan döyüşlərdə qəhrəmanlıq göstərərək həyatını itirib.
Azərbaycan xalqı müharibə illərində həm ön cəbhədə, həm də arxa cəbhədə böyük fədakarlıq nümayiş etdirib. Bu gün ölkənin müxtəlif bölgələrində Böyük Vətən müharibəsində həlak olanların xatirəsi ehtiramla yad edilir, abidələri ziyarət olunur.
9 May həm də milyonlarla insanın həyatına son qoyan müharibənin acı xatirəsini yada salan tarix kimi yadda qalır.
