Bir vaxtlar Quba şəhərinin sevilən istirahət məkanlarından biri olan Gənclər parkı bu gün baxımsız vəziyyəti ilə diqqət çəkir.
Shimal.News-a danışan sakinlər bildiriblər ki, müşahidələrinə görə, park gecə saatlarında demək olar ki, tam qaranlığa qərq olur. Ərazi işıqlandırılmadığından sakinlər axşam saatlarında buraya gəlmək istəmir. Yalnız parkın yuxarı hissəsində fəaliyyət göstərən restoranın işıqları ərazinin kiçik bir hissəsini işıqlandırır.
Sakinlərin sözlərinə görə, attraksionların əksəriyyəti təmirə ehtiyac duyur, oturacaqlar köhnəlib, parkın təmizliyinə isə lazımi səviyyədə nəzarət olunmur.
"Axşam park çox vahiməli görünür. İşıq yoxdur, insanlar burada rahat istirahət edə bilmir", – deyə sakinlər bildirirlər.
Qeyd edək ki, Shimal.News hələ 2022-ci ildə də Gənclər parkındakı baxımsızlıqla bağlı xəbər yayımlayıb. Aradan dörd ilə yaxın vaxt keçməsinə baxmayaraq, parkın problemlərinin böyük hissəsi hələ də həll olunmayıb. Hazırda Quba şəhərində sakinlərin daha çox üz tutduğu istirahət məkanı isə Nizami parkıdır.
Sakinlər Gənclər parkında işıqlandırmanın bərpa edilməsini, attraksionların yenilənməsini və ərazidə müntəzəm təmizlik-baxım işlərinin aparılmasını istəyirlər.
