Xaçmaz şəhərində Yeni il ərəfəsində gözlənilən bayram ab-havasından əsər-əlamət yoxdur.
Şəhər sakinlərinin Shimal.News-a bildirdiyinə görə, bu il sanki Yeni ili "ləğv edib".
Şəhərin mərkəzi və məhəllə araları bayram ab-havasına bürünməyib. Küçələr bəzədilməyib, bayramı rəmzi olan şam ağaclarına və dekorativ elementlərə rast gəlinmir. Sabah bayram olsa da, şəhərdə adi gün təsiri bağışlayan bir sakitlik hökm sürür.
Zəfər Parkı isə adətən bayram günlərində insanların axışdığı məkan olsa da, bu dəfə tamamilə boş qalıb. Bayram konsertləri, tədbirlər, musiqi sədaları yoxdur.
Diqqətçəkən məqam odur ki, şəhər ərazisində yeganə yolka mərkəzdə deyil, şəhərdən kənarda yerləşən Çənlibel parkında quraşdırılıb. O da rəsmi qurumlar tərəfindən yox, fotoqrafların şəxsi təşəbbüsü ilə – şəkil çəkdirib gəlir əldə etmək məqsədilə.
Sakinlər bildirirlər ki, indiyədək Xaçmazda Yeni ilin bu qədər sönük qarşılandığı olmayıb. "Heç vaxt belə olmamışdı. Şəhər sanki bayramı unutdurmaq istəyir", – deyə narazılıqlarını ifadə edirlər.
