Bu il Ramazan və Novruz bayramlarının eyni dövrə təsadüf etməsi qeyri-iş günlərinin sayını artırıb. Belə ki, 5 günlük iş həftəsi ilə çalışanlar üçün martın sonunadək ümumilikdə 11 gün qeyri-iş günü olacaq. Azərbaycanda ən uzunmüddətli tətil günlərindən biri olan Novruz bayramı yaxınlaşdıqca, vətəndaşların regionlara axını sürətlənir. Artıq bir çoxları bayram günlərini ailəsi ilə birlikdə bölgələrdəki istirahət mərkəzlərində keçirmək üçün hazırlıqlara başlayıb.
Müxtəlif rayonlarda fəaliyyət göstərən məşhur otellərin bayram qiymətləri araşdırılıb.
Belə ki, şimal rayonları üzrə fəaliyyət göstərən ən bahalı otel - Şamaxı Palace Şaradil (Şamaxı) 940 manat, ucuz isə - Sheki Palace Hotel (Şəki) 210 manatdır.
Aşağıdakı cədvəldə təqdim olunan qiymətlər əsasən 20-22 mart tarixlərini əhatə edir. Qiymətlər 2 nəfər üçün nəzərdə tutulub və paketlərə daxil olan xidmətlərə görə fərqlənir. Qiymətlər otellərin təqdim etdiyi Standart, Deluxe və King otaq tipləri üzrə götürülüb.
Araşdırma zamanı məlum olub ki, bəzi otellərdə 20-22 mart tarixləri üçün artıq boş yer qalmayıb. Siyahıda ulduz (*) işarəsi ilə qeyd olunan otellərdə həmin tarixlər dolu olduğu üçün, alternativ olaraq 18-20 mart tarixlərinin qiymətləri qeyd edilib: Sheki Palace Hotel, Marxal Resort & Spa, Basqal Resort & SPA və Macara Lake Park
Qeyd edək ki, hər kəsin bayramda rayonlara üz tutması səbəbindən otellərdəki qiymətlər dinamikdir və hər an dəyişə bilər.
(banker.az)
